Ko hono puka ‘o ha ‘apoinimeni ki he huhu malu‘í Book a vaccine appointment

Fetu‘utaki ki ho‘o toketā, neesi, pe kautaha tokoni ki he mo‘ui lelei angamahení kapau ‘oku fiema‘u ke puka ha ‘apoinimeni huhu malu‘i. Palani ‘o ‘ikai toe si‘isi‘i ange ‘i ha uike ‘e 1 pe 2 ki mu‘a ke ke ma‘u ha taimi mo ha ‘aho ‘oku faingamālie lelei kiate koe mo ho fāmilí.

Kapau ‘oku ‘ikai ke ke lava ‘o telefoni, vakai‘i ‘a e uepisaiti ho‘o kautaha tokoni ki he mo‘ui leleí ki ha ngaahi founga kehe ke puka ‘aki ‘a e ‘apoinimení.

Kole ki ha ‘apoinimeni huhu malu‘i ma‘a koe pe ko ho‘o ki‘i leká. ‘E fiema‘u ke ke ‘omai ‘a e hingoa mo e ‘aho fā‘ele‘i ‘o e tokotaha ‘oku fai hono huhu malu‘í. ‘E ‘ilo‘i ‘e he kautaha tokoní ‘a e huhu malu‘i ‘okú ke fiema‘ú koe‘uhí ‘oku nau lava ‘o ma‘u ‘eni ‘i he National Immunisation Register (Tohi Lēsisita Fakafonua ki he Huhu Malu‘í).

Ko e teuteu atu ki ho ‘apoinimení

Founga ke lēsisita ai ki ha toketā

Telefoni ki ho‘o toketā fakafeitu‘ú pe kautaha tokoni ki he mo‘ui leleí ‘o ‘eke pe ‘oku nau lolotonga lēsisita ha kau mahaki fo‘ou. Kapau ‘oku ‘ikai ke ke fakapapau‘i pe ko hai ‘a e kautaha tokoni ki he mo‘ui leleí ‘i he feitu‘ú, ‘e lava ke ke kumi ia ‘i he uepisaiti ‘a e Healthpoint. Kau atu ki hono talaatu pe ‘oku lolotonga lēsisita ‘e he toketaá ha kau mahaki fo‘ou, ‘oku ma‘u ‘e he Healthpoint ‘a e ngaahi fakaikiiki ki he fetu‘utakí te ke lava ‘o ngāue‘aki ke telefoni mo talanoa ki ai fekau‘aki mo hono lēsisita ho‘o ki‘i leká pe ko ha taha kehe ‘i ho fāmilí.

Kumi ha toketā ‘i homou feitu‘ú – Healthpointexternal link

‘Oku ta‘etotongi ‘a hono lēsisita ‘a e fānau kotoa ‘oku si‘isi‘i hifo ‘i he ta‘u 14.

Kapau ‘okú ke fiema‘u ha tokoni ki he lēsisitá, ‘e lava ke tokoni atu ho‘o mā‘ulí, falemahakí, pe ko e tokoni atu ho‘o neesi ‘i he Well Child Tamariki Ora ke ke lēsisita ho‘o ki‘i leká ki ha toketā, pe ma‘u atu ‘a e ngaahi huhu malu‘í ‘o fakafou ‘i ha kautaha kehe ‘oku tokoni ki he mo‘ui leleí.

Kapau ‘oku ‘ikai ke ke ma‘u ha toketā ke lēsisita ki ai ho ki‘i leká, telefoni ki he:

• Healthline ‘i ha fa‘ahinga taimi pē ‘i he 0800 611 116 (‘oku ‘i ai ‘a e kau liliu-lea ‘oku ‘atā atu), pe
• PlunketLine ‘i ha fa‘ahinga taimi pē ‘i he 0800 933 922.

Tenau lava ‘o tokoni ke fakafehokotaki koe mo ha kautaha tokoni ki he huhu malu‘í ‘i ho feitu‘ú.

Te ke lava ‘o puka ha ‘apoinimeni ki he kotoa ‘o e ngaahi huhu malu‘í ‘i he National Immunisation Schedule (Taimi Tēpile Huhu Malu‘i Fakafonuá), kau ai mo e ngaahi huhu malu‘i COVID-19 mo e flu ‘o fakafou ‘i he Book My Vaccine.

• Puka ‘i he ‘initanetí: Book my vaccine (fehokotaki‘anga ki tu‘á) 
• Puka ‘i he telefoní: 0800 28 29 26— 8:30 pongipongi ki he 5 efiafi, Mōnite ki he Falaite (tukukehe ‘a e ngaahi ‘aho mālōloó).

‘Oku fiema‘u ke puka ‘a e ngaahi huhu malu‘i ki he kakai ‘oku folaú (kau ai ‘a e huhu malu‘i ki he mīselé) ‘o fakafou ‘i ho‘o toketā, neesi, kautaha tokoni ki he mo‘ui leleí, pe kilīniki ki he fefolau‘akí.

‘Oku ‘i ai ha lisi mo ha mape ‘a e Healthpoint ki he ngaahi feitu‘u ‘oku lava ai ‘e ha fa‘ahinga taha pē ‘o ma‘u atu ai ha huhu malu‘i. ‘Oku kau ki heni ‘a e ngaahi fale talavai mo e kau toketā ‘oku nau tokoni ki he kau mahaki ‘oku ‘ikai ke lēsisitá.

• Ngaahi feitu‘u fai‘anga huhu malu‘i ‘oku ‘atā atu ki ha fa‘ahinga taha pē — Healthpointexternal link
• Ngaahi feitu‘u fai‘anga huhu malu‘i ma‘á e longa‘i fānaú ‘oku ‘atā atu ki ha fa‘ahinga taha pē — Healthpointexternal link

‘Oku ‘a‘ahi atu ‘a e ngaahi timi meí he potungāue mo‘uí ki he ngaahi ‘apiako ‘oku kau maí ke huhu malu‘i ‘a e fānau akó ki he HPV mo e tetanus, diphtheria, mo e tale loloá — ‘o angamaheni ‘i he Ta‘u Fakaako 7 mo e 8. ‘E ‘oatu ‘e he ‘apiako ‘a ho‘o tamá kiate koe ‘a e fakamatala mo e ngaahi foomu fakangofua.

Kapau na‘e ‘ikai ke ma‘u atu ‘e ho‘o ki‘i tamá ha huhu malu‘i ‘i he ‘apiakó, fetu‘utaki ki he ‘apiakó ke vakai pe ‘oku ‘i ai ha ‘aho huhu malu‘i ‘e toe faingamālie ‘amui ange.

Kapau ‘oku ‘ikai ke fakahoko ha huhu malu‘i ‘i ho ‘apiakó, pe kapau na‘e ‘ikai ke lava ‘o ma‘u ia ‘e ho‘o ki‘i tamá ‘i ha fa‘ahinga ‘uhinga pē, ‘e lava lelei pē kenau ma‘u atu ia ‘i ha ‘a‘ahi ki ho toketaá, neesí, pe kautaha tokoni ki he mo‘ui leleí. Ko ha fili foki ‘eni kiate koe kapau ‘oku ke loto ke ke ‘i ai tonu mo ho tamá ‘i he taimi ‘e fakahoko ai hono huhu malu‘í.

‘E malava ke ma‘u atu ‘e he kakai lalahí, fānau lalahi angé, mo e to‘utupú ha ngaahi huhu malu‘i ‘i he ngaahi fale talavaí kau ai ‘a e:

• flu
• mīselé, moó, mo e rubella (MMR)
• HPV
• chickenpox
• tetanus, diphtheria, tale loloá (Boostrix)
• meningococcal
• COVID-19.  

Fetu‘utaki ki ho fale talavai fakafeitu‘ú ke ‘ilo pe ko e hā ‘a e ngaahi huhu malu‘i ‘oku nau fakahokó pea kapau ‘oku fiema‘u ke ke puka ha ‘apoinimeni. Ki mu‘a ke ke puká, vakai‘i pe ‘oku ‘i ai ha totongi ‘oku fiema‘u ki ai. 

‘Oku ma‘u ‘e he Healthpoint ha lisi ‘o e ngaahi fale talavai ‘i ho feitu‘ú mo e ngaahi fakaikiiki ki he fetu‘utaki ki aí.

Kumi ha fale talavai ‘oku nau fakahoko ‘a e ngaahi huhu malu‘í ‘i ho feitu‘ú — Healthpointexternal link

‘I he taimi ‘okú ke puka ai ha ‘apoinimeni, fakapapau‘i ke fakahoko ange ki he timí pe ‘okú ke fiema‘u ‘e koe pe ko ho‘o fānau ha tokoni makehe ange.

Te nau ala lava ‘o:

• ‘oatu ha feitu‘u ‘ata‘atā ‘oku mama‘o meí he kakai kehé
• tokoni‘i koe mo e fānau kehe ‘okú ke ‘omai ki he ‘apoinimení
• fokotu‘utu‘u ha tokoni kiate kinautolu ‘oku faingata‘a ‘enau fe‘alu‘akí mo e nga‘unu holó
• fokotu‘utu‘u ha ‘a‘ahi atu ki ‘api - ‘e ala fakahoko ‘eni fakafou ‘i ha kautaha kehe ki he mo‘ui leleí.

‘Oku ‘i ai ‘emau timi mavahe ma‘á e kau faingata‘a‘ia fakaesinó te ke lava ‘o telefoni ki ai houa ‘e 24 ‘i he ‘aho, ‘aho ‘e 7 ‘i he uike.

• Telefoni: 0800 11 12 13
• Text: 8988 ta‘etotongi
• ‘Īmeili: access@whakarongorau.nz

‘E tali atu ‘e ha tokotaha ‘oku ‘i ai ‘ene a‘usia pe ‘ilo ki he faingata‘a‘ia fakaesinó ‘a ho‘o telefoní meí he 8 pongipongi ki he 8 efiafi. Hili ‘a e 8 efiafi, ‘oku tali ‘a e ngaahi fetu‘utaki telefoni maí ‘e ha tokotaha ngāue kuo ako‘i ‘i he timi Healthline.

‘E lava ke ke ‘eke ange ha ngaahi fehu‘i fekau‘aki mo e:

• tokoni ki hono fakafaingofua‘i ‘a e fe‘alu‘aki ‘a e kau faingata‘a‘iá ‘i he ngaahi feitu‘u huhu malu‘i kehekehe
• ma‘u atu ko ia ‘o e ngaahi huhu malu‘í ‘i ha founga malu
• huhu malu‘i ‘i ‘api ma‘á koe pe ko ho‘o fānaú.

Kapau ‘oku ‘i ai ha‘o ngaahi fehu‘i pe ‘okú ke loto ke talanoa ki ha tokotaha fekau‘aki mo ho huhu malu‘í, pe ko e huhu malu‘i ho ki‘i tamá te ke lava ‘o: 

• talanoa ki ho toketaá, neesí, tokotaha palofesinale falala‘anga ki he mo‘ui leleí, tokotaha tokangaekina ‘o e kakai feitamá, pe neesi ‘i he Well Child Tamariki Ora
• telefoni ki he Healthline ‘i ha fa‘ahinga taimi pē ‘i he 0800 611 116 — ‘oku ‘i ai ‘a e kau liliu-lea ‘oku ‘atā atu
• telefoni ki he PlunketLine ‘i ha fa‘ahinga taimi pē ‘i he 0800 933 922.