Some health workers at Health NZ public hospitals and services are planning to strike on Thursday 23 October to 7am on Friday 24 October.
Emergency departments will be open for emergencies only. For more information:
Feitamá mo e ngaahi huhu malu‘í Pregnancy and immunisations
‘I he taimi ‘okú ke feitama aí, ‘oku mau fokotu‘u atu ke ke huhu malu‘i ki he tale lōloá, flu mo e COVID-19.
This content is available in other languages and alternate formats:
Huhu malu‘i te ke fiema‘ú kapau ‘okú ke palani ke feitama
‘Oku mau fokotu‘u atu ke fakakakato ho‘o ngaahi huhu malu‘í kapau ‘okú ke palani ke ke feitama.
‘Oku tautautefito ‘a e mahu‘inga ke ke ‘ilo‘i ‘oku malu‘i koe meí he:
- mīselé
- rubella
- chickenpox.
‘E ‘ikai ke ke lava ‘o ma‘u atu ‘a e ngaahi huhu malu‘i ko ‘ení ‘i he taimi te ke feitama aí, pea ‘e lava kenau fakatupunga ha fakatu‘utāmaki kiate koe pea mo ho‘o pēpē kei tupú.
‘Oku mātu‘aki mahu‘inga ke ke ma‘u ha tu‘oni huhu ‘e 2 ‘o e huhu malu‘i MMR ‘o ‘ikai toe si‘isi‘i hifo ‘i ha māhina ‘e taha ki mu‘a ke ke feitamá. ‘E ‘ikai lava ke ke ma‘u atu ha huhu malu‘i MMR lolotonga ho‘o feitamá.
Ko hono ma‘u ‘a e mīselé lolotonga ‘a e feitamá ‘e lava ke ke iku ai ‘o puke lahi, pea malava ke ne fakatupunga ha tama-tō, fā‘ele‘i ha pēpē ‘oku ‘osi mate mo e fā‘ele ta‘ehoko.
‘E lava ke fakatupunga ‘e he rubella ha ngaahi palopalema fakatu‘utāmaki ki ho‘o ki‘i pēpeé — hangē ko e tulí, palopalema ‘o e mafú, mo e uesia ‘o e ‘utó.
Ke vakai‘i pe kuó ke ‘osi huhu malu‘i, fetu‘utaki ki ho‘o toketaá, neesí, pe kautaha tokoni ki he mo‘ui leleí ‘o ‘eke pe kuó ke ‘osi ma‘u ha tu‘oni huhu ‘e 2 ‘o e huhu malu‘i MMR.
Kapau ‘e ‘ikai ke ke malava ‘o ‘ilo pe kuó ke ‘osi huhu malu‘i, ‘oku fokotu‘u atu ke ke fakahoko ho huhu malu‘í ‘i he vave taha ‘e ala lavá. ‘E ta‘etotongi pē ‘eni. ‘Oku ‘ikai ha maumau ‘i hono ma‘u ha tu‘oni huhu lahi ange ‘o e MMR — ‘oku mahu‘inga ke ‘ilo‘i kuó ke ‘osi ma‘u ha tu‘oni huhu ‘e 2.
Ko hono ma‘u ‘a e chickenpox lolotonga ‘a e feitamá ‘e lava ke ne uesia ho‘o ki‘i tama te‘eki fā‘ele‘í pea ala lava ke ne fakatupunga ke fā‘ele‘i mai kuo mate.
Kapau ‘oku ‘ikai ke ke malava ‘o ‘ilo pe na‘á ke ‘osi ma‘u ‘a e chickenpox, pe ‘oku te‘eki ai ke ke huhu malu‘i, ‘oku fokotu‘u mālohi atu ke ke ma‘u ha huhu malu‘i ki he chickenpox ki mu‘a ke ke feitamá. ‘E $170 nai ‘a e totongi ki hení.
‘E ‘ikai ke malava ke ke ma‘u ha huhu malu‘i ki he chickenpox lolotonga ho‘o feitamá.
Fekau‘aki mo e huhu malu‘i ki he chickenpox
Ngaahi huhu malu‘i ‘e fiema‘u kiate koe lolotonga ho‘o feitamá
‘Oku fakatu‘utāmaki ange ‘a e ngaahi mahaki ‘e ni‘ihi lolotonga ho‘o feitamá. ‘E lava ke ke malu‘i koe mo ho‘o ki‘i pēpeé lolotonga ho‘o feitamá ‘aki hono ma‘u atu ha huhu malu‘i ta‘etotongi ‘e 3.
Neongo ‘e ‘ikai ke uesia ‘e he huhu malu‘í ho‘o ki‘i pēpeé, ‘e fakanatula ke ke paasi atu ha tu‘unga malu‘i ‘e ni‘ihi. ‘Oku ‘uhinga ‘eni ‘i he taimi ‘e fā‘ele‘i mai ai kinautolú, tenau ma‘u ha ki‘i malu‘i kae‘oua kuo nau lahi fe‘unga ke huhu malu‘i kinautolu. ‘Oku tautautefito ‘ene mahu‘ingá ki he tale lōloá.
‘Oku tautautefito ‘a e fakatu‘utāmaki ‘a e tale lōloá ki he fanga ki‘i pēpeé — tautautefito ki he fa‘ahinga ‘oku te‘eki ai ke huhu malu‘í. ‘Oku laka hake ‘i he vaeua ‘o e fanga ki‘i pēpē si‘isi‘i hifo ‘i he māhina 12 ‘oku nau tale lōloá pea ‘oku fiema‘u ke ‘ave kinautolu ki falemahaki, pea ‘oku a‘u ki he toko 1 ‘i he toko 50 ‘o e fanga ki‘i pēpē ko ‘ení ‘oku nau mate.
‘I hono ma‘u ‘a e huhu malu‘í ‘i ho‘o feitamá te ke malu‘i ai ho‘o ki‘i pēpeé kae‘oua kuo nau ma‘u ‘enau fuofua huhu malu‘í ‘i he taimi ‘oku nau uike 6 aí. Ko hono ‘uhingá ‘oku paasi atu ho‘o ivi malu‘í ki ho‘o ki‘i pēpeé fakafou ‘i he fonuá (placenta).
‘Oku ngāue lelei taha ‘a e huhu malu‘i ki he tale lōloá ‘i he taimi ‘oku fakahoko ai meí he uike 16 ki he 26 ‘o e feitamá, ka ‘oku ‘atā atu ia ‘o ta‘etotongi meí he uike ‘e 13 ‘o e feitama kotoa pē.
Puka ha huhu malu‘i ta‘etotongi ki he tale lōloá
Kapau te ke ma‘u ‘a e flu lolotonga ho‘o feitamá, ‘okú ke tu‘u laveangofua ange ai ke ma‘u ‘a e niumōniá pea ‘oku ‘i ai ‘a e faingamālie lahi ange ke ke tokoto falemahaki ai.
‘Oku toe fakalalahi foki ‘e he flu ‘a e faingamālie ke hoko ‘a e ngaahi palopalema ki ho‘o ki‘i pēpeé, hangē ko e fā‘ele ta‘ehokó, tama-toó, fā‘ele‘i mai ‘a e ki‘i pēpeé kuo mate mo e tu‘unga mā‘ulalo ‘a e mamafa ‘o e pēpeé ‘i hono fā‘ele‘í.
Te ke lava ‘o ma‘u ta‘etotongi ha huhu malu‘i ki he flu ‘i ha fa‘ahinga taimi pē ‘i ho‘o feitamá.
‘E lava ke puke lahi ‘a e kakai feitamá meí he COVID-19.
Ko e huhu malu‘i ki he COVID-19 ‘oku ‘uhinga iá ‘okú ke fu‘u si‘isi‘i ange ai ‘a e faingamālie ke ke puke lahi aí. ‘Okú ne toe malu‘i foki ho‘o ki‘i pēpeé koe‘uhi kuo ‘i ai ‘a e fakamo‘oni ‘oku malava ke ma‘u ‘e he fanga ki‘i pēpeé ha fanga ki‘i sōtia malu‘i fakafou ‘i he fonuá (placenta) ‘a ia ‘oku tokoni ke nau malu‘i kinautolu meí he COVID-19.
Hangē pē ko ho‘o tu‘oni huhu ‘e 2 ‘uluaki ki he COVID-19, ko e kakai feitama ‘oku lahi hake ‘i he ta‘u 16, ‘e lava kenau huhu fakalahi.
Ke ma‘u atu ha huhu fakalahi ‘oku fokotu‘u atu ke ke tatali ‘o ‘ikai toe si‘isi‘i hifo ‘i he māhina ‘e 6 meí ho huhu malu‘i pe huhu COVID-19 fakamuimuí.
Puka ha huhu malu‘i COVID-19 ta‘etotongi
Huhu malu‘i ma‘á e fa‘ē mo e fāmilí hili hono fā‘ele‘i ho‘o ki‘i pēpeé
‘Oku tu‘u laveangofua ‘aupito ‘a e fanga ki‘i pēpē toki fā‘ele‘í kae‘oua kuo huhu malu‘i kakato kinautolu. Ko e huhu malu‘i ‘a e mēmipa kotoa ‘o ha fāmili ‘okú ne fa‘u ai ha ‘ātakai ‘oku malu ki he ki‘i pēpeé.
Kapau na‘e te‘eki ai ke huhu malu‘i koe ki ha ngaahi mahaki ‘e ni‘ihi ki mu‘a pe lolotonga ho‘o feitamá, te ke lava ‘o fakahoko ia hili hono fā‘ele‘i ho‘o ki‘i pēpeé. ‘Oku mahu‘inga ke fakahoko ‘eni ‘e koe, mo ho fāmilí, koe‘uhi ke malu‘i ai ho‘o ki‘i pēpeé kae‘oua kuo nau lahi fe‘unga ke huhu malu‘i kinautolu.
Hili hono fā‘ele‘i ho‘o ki‘i pēpeé, ‘e ala fokotu‘u atu ke ke ma‘u ha huhu malu‘i ta‘etotongi ki he mīselé, moó mo e rubella (MMR). ‘Oku totonu ke ke fakahoko ‘eni ‘i he vave taha te ke ala lavá.
Huhu malu‘i ki he mīselé, moó mo e rubella (MMR)
Kapau na‘e ‘ikai ke ke fakahoko ha taha ‘o ho‘o ngaahi huhu malu‘í, ‘oua ‘e hoha‘a, ko e lahi taha ‘o e ngaahi huhu malu‘í ‘e toe lava pē ‘o fakakakato. Kapau ‘oku ‘ikai ke ke fakapapau‘i pe kuo fakakakato ho‘o ngaahi huhu malu‘í pe ko ho fāmilí, fetu‘utaki ki ho‘o toketaá, neesí, pe kautaha tokoni ki he mo‘ui leleí.
‘Oku ta‘etotongi kotoa ‘a e ngaahi huhu malu‘i ‘i he Taimi Tēpile Huhu Malu‘i Fakafonuá pea ‘oku malu ia lolotonga ‘a e fakahuhú.
Puka ha huhu malu‘i
‘E lava ke ke puka kotoa ho ngaahi huhu malu‘i ki he feitamá ‘i he ‘initanetí fakafou ‘i he Book My Vaccine.
Te ke toe lava foki ‘o puka ‘i he telefoní ‘aki ha‘o telefoni ki he 0800 28 29 26 – 8 pongipongi ki he 5 efiafi, Mōnite ki he Falaite.
Kapau te ke fiema‘u, te ke toe lava foki ‘o fetu‘utaki ki ho‘o toketaá, neesí, fale talavaí pe kautaha tokoni ki he mo‘ui leleí ke puka ha ‘apoinimeni huhu malu‘i.
Ko e mateuteu atu ko ia ki he fuofua huhu malu‘i ho‘o ki‘i pēpeé
‘Oku fiema‘u ke fakahoko ‘a e fuofua huhu malu‘i ho‘o ki‘i pēpeé ‘i he uike hoko 6. ‘Ai ia ke faingofua ‘aki ho‘o lēsisita tōmu‘a ia ki he toketaá.
Kapau ‘okú ke fiema‘u ha tokoni ki he lēsisitá, ‘e lava ke tokoni atu ho‘o mā‘ulí, falemahakí, pe ko e tokoni atu ho‘o neesi ‘i he Well Child Tamariki Ora ke ke lēsisita ho‘o ki‘i leká ki ha toketā, pe ma‘u atu ‘a e ngaahi huhu malu‘í ‘o fakafou ‘i ha kautaha kehe ‘oku tokoni ki he mo‘ui leleí.
Kapau ‘oku ‘ikai ke ke ma‘u ha toketā ke lēsisita ki ai ho ki‘i leká, telefoni ki he:
- Healthline ‘i ha fa‘ahinga taimi pē ‘i he 0800 611 116 (‘oku ‘i ai ‘a e kau liliu-lea ‘oku ‘atā atu), pe
- PlunketLine ‘i ha fa‘ahinga taimi pē ‘i he 0800 933 922.
Tenau lava ‘o tokoni ke fakafehokotaki koe mo ha kautaha tokoni ki he huhu malu‘í ‘i ho feitu‘ú.