Ngaahi uesia, ngaahi ongo‘i mo e malu meí he huhu malu‘í Vaccine side effects, reactions and safety

Hangē ko e ngaahi faito‘o lahi, ‘e lava ke fakatupunga ‘e he huhu malu‘í ha ngaahi ongo‘i. ‘Oku angamaheni ke tō ma‘ama‘a pē ia, pea ‘e ‘ikai ke ma‘u ia ‘e he tokotaha kotoa.

‘Oku angamaheni pē ‘a e ngaahi ongo‘i ‘oku tō ma‘ama‘á pea ‘oku fakahaa‘i mei ai ‘oku fakafeangai ho sisitemi malu‘í ki he huhu malu‘í.

Kapau te ke hokosia ha fa‘ahinga ongo‘i, ‘oku angamaheni ke hoko ia ‘i he ngaahi ‘aho si‘i hili hono ma‘u ‘a e huhu malu‘í. ‘Oku mavahe ‘a e faito‘o huhu malu‘í ia mei ho sinó ‘i loto ‘i ha ngaahi houa pe ‘aho lolotonga ‘a e ngāue ki ai ‘a e sisitemi malu‘í.

‘Oku kau ki he ngaahi ongo‘i angamaheni ki ha huhu malu‘i ‘a e:

• mofi ma‘ama‘a
• mamahi pe pupula ‘a e feitu‘u na‘e huhu‘i ai ‘a e fo‘i huí.

‘Oku hāhāmolofia ke hoko ‘a e ngaahi uesia fakatu‘utāmaki ki he sinó. Ko e toko 1 nai pē ‘i he kakai ‘e toko 1 miliona tenau hokosia ‘eni.

Kuo ako‘i lelei ‘a e tokotaha ‘okú ne fakahoko ‘a e huhu malu‘í pea ‘okú ne ‘ilo ‘a e me‘a ke siofí pea lava ‘o faito‘o vave ha fa‘ahinga uesia ki he sinó kapau ‘e hoko.

‘Oku fa‘a hoko ‘a e ngaahi uesia ki he sinó ‘i loto ‘i he ngaahi lau miniti meí he huhu malu‘í, ko e ‘uhinga ia ‘oku fiema‘u ai ke ke tatali ‘o a‘u ki ha miniti ‘e 20 hili ‘a e huhu malu‘í.

‘Oku kehekehe pē ‘a e ngaahi ongo ki he huhu malu‘i kotoa pē. ‘I he ‘apoinimení, ‘e talaatu ‘e he tokotaha ‘okú ne fakahoko ho huhu malu‘í ‘a e ngaahi ongo‘i ke ke siofí. ‘E tokoni atu ‘eni ke ke ‘ilo ‘a e me‘a ke ‘amanekiná.

Hangē ko ‘ení, ko e fānau pe kakai lalahi ‘e ni‘ihi tenau ala hokosia ha mofi pe ko ha veveli ma‘ama‘a pē. Ko ha fakafeangai ‘eni ‘oku ‘amanekina pē ia hili ha ngaahi huhu malu‘i ‘e ni‘ihi, pea ‘oku angamaheni ke taimi nounou pē. ‘Oku ‘ikai ke ‘uhinga ia ‘oku puke ho‘o tamá.

Kapau te ke fili ‘a e ngaahi huhu malu‘i kehekehe ‘oku lisi atu ‘i he Taimi Tēpile Huhu Malu‘i Fakafonuá te ke lava ‘o ‘ilo ai fekau‘aki mo e ngaahi ongo‘i pau ‘oku felāve‘i mo e huhu malu‘i takitaha.

Taimi Tēpile Huhu Malu‘i Fakafonuá

Founga ke faito‘o ‘aki ‘a e ngaahi ongo‘i ‘oku hokosia ‘e he fānaú

‘Oku kau ki he ngaahi founga ke ke ‘ai ai ho‘o tamá ke ongo‘i fiemālie hili ‘enau huhu malu‘í ‘a e ngaahi me‘á ni.

• Kapau ‘oku mamahi honau nimá pe va‘é meí he huhu malu‘í, tuku ha konga tupenu viviku pe ko ha milemila (‘oku kofu‘aki ha konga tupenu mōmoa) poloka ki ai. ‘Oua ‘e mili ‘a e feitu‘u na‘e huhú.
• Kapau ‘oku nau mofi, fakainu ho‘o tamá ‘aki ‘a e vaí ke lahi. ‘Oange ke lahi ‘a e vaí ke ne inu. Kapau ‘okú ke fakahuhu, fafanga ke lahi ho‘o tamá.
• Kapau ‘e fu‘u ‘afu‘ia ho‘o tamá, fakasi‘isi‘i ‘a e vala ‘okú ne tuí.
• ‘Ō‘ōfaki ma‘u pē ho‘o tamá.

‘Oatu ha paracetamol pe ibuprofen ke ne folo ‘o fakatatau ki he fale‘i ‘a e toketaá, neesí, pe kautaha tokoni ki he mo‘ui leleí.

Kapau te ke hokosia ‘e koe pe ko ho‘o tamá, ha fa‘ahinga uesia tamaki hili ‘a e huhu malu‘í, te ke lava ‘o līpooti ia ki he Centre for Adverse Reactions Monitoring (CARM).

Līpooti ha uesia tamakiexternal link

Hili hono ma‘u atu ha vai ma‘á, ko e huhu malu‘í ‘a e founga fakafaito‘o ola lelei taha ia ‘i māmani ki hono fakahaofi ‘o e ngaahi mo‘uí.

Hangē pē ko hono holoki ‘a e tu‘unga laveangofua ke ke hoko ‘o puke lahí, ‘oku lahi ‘a e ngaahi lelei kehe ‘o e huhu malu‘í.

‘Oku angamaheni pē ia ke ongo‘i tokanga, tautautefito ‘i ha‘o fai ha tu‘utu‘uni fekau‘aki mo e mo‘ui lelei ‘a ho‘o fānaú, ka ko e ngaahi lelei ‘o hono ma‘u atu ‘e ho‘o tamá ‘a e huhu malu‘í ‘oku laka ange ia ‘i he ngaahi tu‘unga ala fakatu‘utāmaki ‘oku ha‘u fakataha mo hono ma‘u ‘a e mahakí ‘i ha ‘ikai kenau huhu.

Ko e ngaahi huhu malu‘i kotoa ‘oku ma‘u atu ‘i Nu‘u Silá kuo sivisivi‘i ia ki he tu‘unga malú mo e ola leleí.